100萬多寶6寶全攻略
為迎接新一年來臨，馬會足智彩於今日元旦日「6寶半全場」特別增設100萬元多寶彩池，6關場次全為英超賽事，截止投注時間為晚上11時。雖然大家對好多英超球隊都已經耳熟能詳，不過投注「6寶」唔係單睇實力咁簡單，邊支球隊擅於早段發力、邊隊後勁凌厲、邊隊慣性有頭威、冇尾陣，呢啲數據都對投注「6寶」有極大幫助，今日呢個全攻略就為大家詳盡分析今晚六關賽事，想發新年財一定要實！

第一關8　(2)曼城Vs史篤城(8)
曼城牌面雖然稍高，不過球隊近6場主場只曾一次半場領先。史篤城10場作客有6次開「半場和」，其中僅負1次予車路士，其餘1勝4和，就算輸波亦有機會守到半場，熱選「和主」、「和和」。曼城近5場主場有2次半場落後，而史篤城作客2次領先半場，最終都開和局，扒冷可敲「客和」。

熱選：和主、和和

冷選：客和

第二關9　(10)史雲斯Vs阿士東維拉(17)
維拉今季10場作客輸6場，史雲斯主場成績亦唔算標青，10場主場僅3勝，勝出率只有3成，今仗和波機會較高。史雲斯主場5次和波從未試過領先，選「和和」或「客和」。考慮到史雲斯今季主場只要能夠領先上半場，最後都能保住勝果完場，如認為主隊能全取3分不妨選「主主」。

熱選：和和、客和

冷選：主主

第三關10　(4)熱刺Vs雷丁(19)
雷丁作客2和8負未贏過，作客白鹿徑料凶多吉少。不過雷丁甚少由頭輸到尾，10場作客只有2次半場落後，上半場演出明顯較佳。熱刺今季主場出擊上半場表現亦一般，10場聯賽只有2次能夠領先上半場，其餘8戰6和2負，面對另一支下游球隊昆士柏流浪亦曾半場落後，可敲較冷門的「客主」。

熱選：和主

冷選：客主

第四關11　(12)韋斯咸Vs諾域治(11)
韋斯咸10場聯賽主場有4次半場領先，其中2次能夠全取3分，其餘2次則反勝為敗。諾域治今季作客只曾1勝，要贏波有一定難度，不過佢哋最近兩次作客半場落後，最終都能追和對手，有一定後勁，而且佢哋作客和波比率達5成，「主主」及「主和」皆是不錯選擇。

熱選：主主、主和

冷選：和和

第五關12　(16)韋根Vs曼聯(1)
曼聯近年對韋根贏多輸少，全取3分機會高，紅魔鬼今季經常後上反勝，不過單計作客賽事，佢哋只曾開過1次「主客」，由頭贏到尾嘅「客客」則有4次，可熱選。曼聯今季聯賽少和波，如果唔信往績想扒冷，可索性捧韋根贏波，曼聯今季作客2次輸波都開「和主」，可一試。

熱選：客客

冷選：和主

第六關35 (18)修咸頓Vs阿仙奴(5)
阿仙奴聯賽三連勝，表現回勇，今訪修咸頓勝算高，兵工廠今季作客贏波未試過半場落後，可雙選「和客」及「客客」。如果唔睇好阿仙奴嘅朋友，可選較冷門嘅「和和」，修咸頓10場主場有5場開出「半場和」，其中最近3場有2次開「和和」，值得留意。

熱選：和客、客客

冷選：和和

( )為聯賽排名

手機、網上投注最Easy
投注6寶半全場傳統方式係去投注站填飛仔，夠晒實際，呢個彩池亦有電腦飛，每票$20共兩注，可以博博彩數。不過，元旦日撞正係賽馬日，大家唔想嘥時間排隊，最快捷方便梗係用網上投注，只要大家有投注戶口，於足智彩官方網頁「投注區」跟住指示完成登記步驟，之後就可上網投注，click幾click就可以落注，相當輕鬆。不過，講到最新最潮最方便嘅方式一定係用手機投注，大家可以用智能電話下載香港賽馬會應用程式，登入後即可隨時隨地揀選心水注項，夠晒方便！

5蚊注玩法夠靈活
投注「6寶」最緊要夠靈活，因應每次賽事情況調整策略，若果總投注金額達$100或以上，每注金額最低係$5，例如每關都揀兩個投注選擇，總注數64注，每注10蚊要$640，可改買每注5蚊，總投注$320，每場揀兩個投注選擇命中機會當然較高，但係本錢都係偏高。

大家可以參考以下投注組合，先搵2關做膽，每關1個投注選擇，另外3關揀2個投注選擇，最後1關3個投注選擇，總注數24注，5蚊買$120。若有3關心水，每關揀1個投注選擇，其餘3關揀3個投注選擇，共27注，每注5蚊總投注$135，呢個組合亦適合鍾意刀仔鋸大樹嘅朋友。