經過短暫歇冬，今晚意甲重開先踢兩場，Ali建議大家捧晒主隊，卡坦尼亞同拉素主Ｗ二串一，乘埋有超過2.6倍分頭不俗，值得一試。 先講卡坦尼亞主場對拖連奴，Ali喺呢個欄已經提過，卡坦尼亞係我今季嘅銀行隊，呢支平民球隊名氣唔大，但戰鬥力強橫，教練馬蘭令呢支欠缺球星嘅隊伍融為一個十分團結嘅整體，亦敢於踢進攻足球。

卡坦尼亞冇失「拖」

卡軍歇冬前最後一仗雖然敵不過頻密賽程，作客輸畀弱旅佩斯卡拉，但經過兩星期休養生息，相信可以重拾朝氣，佢哋向來靠主場搵食，今季9場主場聯賽贏咗6場，只有祖雲達斯、拿玻里同AC米蘭3支勁旅可以喺佢哋主場保持不敗，今晚強陣出擊，有力打敗今季作客只曾1勝嘅拖連奴。

至於尾場拉素主場鬥卡利亞里，拉素季前目標係聯賽3甲，睇走勢甚至有機會超額完成，呢班波最令Ali欣賞嘅地方係佢哋一啲都唔保守，即使取得領先優勢亦唔會退縮，球隊歇冬前已保持於各項賽事11場不敗強勢，贏過羅馬同國際米蘭，亦和過祖雲達斯，賽績極之硬淨。

拉素亦係今季意甲最佳主場球隊之一，同祖雲達斯、費倫天拿一樣贏過7場，今仗雖然有中場艾達臣同奧根耶奧拿斯缺陣，前鋒洛基歇冬期轉投國米，但正選陣容依然完整，星級射手高路斯經小休後隨時會大爆發；卡利亞里歇冬前於意甲已5連敗，今仗更有一對主力守將艾斯托利同法蘭斯高比辛奴雙雙停賽，作客強勢嘅拉素凶多吉少。