今晚西盃８強首回合強勁戲碼，由馬德里體育會主場迎戰貝迪斯守尾門，兩軍同屬聯賽前列分子，馬體會話晒坐擁全勝主場，唔會咁易畀你拆咗個金漆招牌，不過貝迪斯愈戰愈勇，來者不善，預計主隊唔會贏得咁輕鬆，一於冷敲3.55倍嘅「讓球和」。

歇冬前後，馬體會狀態明顯冇季初咁sharp醒，特別係球隊太過倚賴法卡奧入波，近排呢位哥倫比亞射手突然沉咗，前拍檔阿祖安盧比斯因唔弗而被雪藏，巴西前鋒迪亞高哥斯達雖然表現落力，但建樹唔多，加上好多對手都擺出鐵桶陣，令馬體會最煞食嘅快速反擊無用武之地，因此就算贏波，亦踢得非常辛苦。

相反貝迪斯成績穩步上揚，上仗缺少中場核心比納特，都能輕取硬淨嘅利雲特，表現極具說服力，尤其係射手魯賓卡斯度腳風順到不得了，而阿仙奴借將祖爾甘保亦漸入佳境，其靈巧快速嘅踢法，同魯賓卡斯度配合能互補長短，歇冬後兩場聯賽贏晒，難怪可壓過馬拉加升上前四。

雖然大敵臨門，但馬體會主場威力唔係浪得虛名，佢哋今季15仗喺卡達朗球場嘅正式賽事全部贏晒，戰績仲勁過巴塞，加上馬體會人腳點秤都高過「綠白軍」，所以會係險勝格局，「讓球和」有3.55倍非常和味值得一試。