德甲Fight Back玩大佢！
德甲重開，頭炮係史浩克04主場迎戰漢諾威，史浩克換帥後踢法更開放，遇上德甲大盤王漢諾威預期係一場入球騷，1.59倍大盤係穩陣之選，若嫌賠率乏味，考慮到史浩克缺態兼陣容不整，漢諾威受讓半一可博下盤。

史浩克攻力唔弱但防線問題多，即使喺保守嘅前度主帥史堤芬斯手上，今季每場平均總入球亦達到3.06個，如今換上進取型嘅贊斯基拿，踢法更開放，球隊歇冬期3場熱身賽合共失咗8球，除咗喺多哈慘吞拜仁5蛋外，面對弱旅艾薩德同柏達邦都有失波，後防大將柏柏杜普路斯繼續因傷缺陣，中場硬漢鍾斯同射手亨特拉爾停賽，另外兩名中場阿費利同摩列斯因傷缺陣，陣容不整，即使主場都冇贏波把握。

漢諾威升呢反攻史浩克
漢諾威大事增兵，剛由阿仙奴外借加盟嘅瑞士國腳中堅佐羅，喺歇冬期幾場熱身賽表現出色，迅速成為防線新領袖，球隊仲引入咗杜伊斯堡嘅德國U19防守球員安德里荷夫曼、哥列迪巴嘅巴西年輕防守中場法蘭卡等新兵，球隊前線本身就擁有馬美迪奧夫、耶高蘭、艾度拿奧爾同舒拿達夫等優質攻擊手，歇冬期熱身賽贏過利華古遜同海倫芬等勁旅，回夠氣實同史浩克對攻，大盤同下盤都值得捧場。