今日Alwin嘅睇法同Oliver一樣，同樣以禾夫斯堡為出擊重心，除咗呢場之外，我亦睇好拜仁慕尼黑同利華古遜，前者力足大炒殘陣出擊嘅弱旅格雷特霍夫，後者亦可以擊退防線欠穩嘅法蘭克福。

先講拜仁慕尼黑主場對格雷特霍夫，拜仁提早落實下季由哥迪奧拿執教，絕對有助穩定軍心，球會上下對未來充滿憧憬，現階段哥帥為咗唔妨礙現任主帥軒歷基斯工作，決心留喺美國惡補德文，而軒帥喺季尾退休後，亦好有機會留喺拜仁擔任董事會顧問，各方面協調得好正，集訓同熱身賽表現清風送爽，陣中除畢斯杜巴養傷外可以夫添出擊，新年主場第一擊遇弱旅點會留手。

格雷特霍夫聯賽15輪不勝淪為榜尾，幾乎篤定降班，今仗仲要超殘陣，隊長兼防線支柱馬拉積停賽，中場大將艾加派比同守將舒美迪高因傷缺陣，連喺歇冬期簽入，期望可以拯救球隊嘅新箭頭迪祖迪積亦因傷唔踢得，佢哋近兩次到訪拜仁分別輸1:5同2:6，今仗「讓球主客和」拜仁讓兩球照捧「讓球主勝」。

至於另一場利華古遜主場對法蘭克福，利華係今屆德甲主場成績最好球隊，亦係唯一主場不敗之師，穩健防守擅打反擊，一眾攻擊手傑斯寧、舒賀爾尼同卡斯特羅狀態出色。

客軍法蘭克福喺大將安達臣蘇亞雷斯因傷長抖後防線嚴重不穩，雖然歇冬期引入禾夫斯堡中堅馬高盧斯頂檔，但此子久疏戰陣下，喺熱身賽錯漏百出，今晚作客面對能攻擅守嘅利華好難偷雞。

拜仁慕尼黑讓球勝 ★★★★

利華古遜勝 ★★★★

禾夫斯堡上盤 ★★★★