經過成個月嘅歇冬期，德甲終於回歸。歇冬後最多爆冷賽果出現，好似早兩星期前重開嘅西甲同意甲賽果都爆到七彩，大家要小心。講到今晚最強嘅德甲戲碼就係尾場雲達不來梅主場對「蜜蜂兵團」多蒙特，今場「蜂雲對決」，冷敲有3.65倍分頭嘅「讓球和」。

不來梅近年已冇乜霸氣，上半季表現平平，暫時排喺十二位。今季德甲仲有賀芬咸、奧格斯堡同格雷特霍夫三隊墊底，所以中游球隊可以話好彩冇乜護級壓力。不來梅上半季冇瓣掂，入球能力疲弱，箭頭尼斯彼德臣正一球隊黑洞，隊友畀親波佢，佢九成都唔可以轉化為入球。

有啲睇頭嘅阿拿奧杜域今場停賽，不來梅攻力就更加弱。進攻唔掂，防守亦一樣差，上半季只得兩場波能夠保住不失，今晚就算有主場，對住多蒙特都好難保清白之身。不過不來梅喺歇冬期間熱身賽表現不俗，曾經作客擊敗土耳其嘅特拉布宗同埋土炮禾夫斯堡，實力喺呢段時間或者提升咗，所以未必會畀對方大炒，揀「讓球和」啱數。

多蒙特一定好吸飛，呢幾季表現都好正氣，大家都知佢哋今季將重點放喺歐聯，聯賽反而冇咁上心，但排緊第三嘅佢哋畀後面嘅球隊追得好貼，所以今場亦係鬥心十足！紐尼沙軒嘅回歸有助士氣，但今晚預計佢會先做後備；另外中堅蘇保迪因傷缺陣，後防負擔重咗，好在其餘主力都可以上場，睇局勢呢場都係「蜜蜂兵團」小勝格局，吼「讓球和」啱數！