科特迪瓦星光閃爆多哥
非洲國家盃D組首輪賽事，大熱門「大象兵團」科特迪瓦終於出場，於南非勒斯滕堡對住多哥。科特迪瓦唔單止人強馬壯，特別係由隊長杜奧巴領銜嘅鋒線星光熠熠，加上上屆決賽互射十二碼輸畀贊比亞失落冠軍，眾將志切於今屆封王彌補遺憾，鬥心不容懷疑，多哥雖有熱刺射手艾迪巴約助陣，但獨力難支，強捧「讓球主勝」。

非國盃一向蠱蠱惑惑，有些實力不俗嘅球隊，因球員想盡快返球會比賽而揸流攤，戰意不明下好難揀波。不過，人才鼎盛嘅科特迪瓦非常正氣，眾將嘅國家榮辱感好強，睇番紀錄，「大象兵團」近四屆決賽周三入四強，更兩度殺入決賽，可惜均以互射12碼飲恨，尤其係上屆只係對住贊比亞，都未能捧盃而回，眾將心有不甘，今屆爭冠決心唔使懷疑。

多哥烏合之眾難偷雞
事實上，科特迪瓦實力超晒班，前線不但有杜奧巴、沙洛文卡勞、謝雲奴、耶高蘭等常規軍，今季於荷甲維迪斯一鳴驚人、半程轟入16球嘅射手韋菲特邦尼亦強勢入選，加埋耶耶托尼、高路托尼、伊保爾等悍將，大有不勝無歸之感。

相反，多哥自06年闖入世盃決賽周後，好耐未威過，今屆臨出發前先落實召入熱刺前鋒艾迪巴約，其他都係烏合之眾，備戰倉卒，要喺科特迪瓦身上搶一分亦唔易。加上科軍踢分組賽分外sharp醒，近四屆十一場分組賽贏咗九場，因此「讓球主勝」捧得過。