拜仁又搵史特加着數

拜仁慕尼黑喺上半季大爆發，大大領先其餘競爭對手，多蒙特、利華古遜只能見其車尾燈。雖然拜仁目前領先分數甚多，但多、利兩軍已重拾正軌，來一招絕地反擊都唔出奇。為求穩奪聯賽獎碟，主帥軒歷基斯喺歐聯重開前肯定會盡力搶分，今晚遇上老對手史特加，一定冇面畀。

史特加對拜仁是德國南部打吡，向來以氣氛極熱烈見稱。拜仁今仗作客雖有畢斯杜巴及門將史達基受傷，但一班正選球員可悉數上陣。佢哋早前喺多哈踢熱身賽曾大勝史浩克04五球，其餘熱身賽亦能保持零失球，狀態勁勇。若果今場用馬里奧高美斯倒戈，真係分分鐘炒得更勁，事關呢位史特加舊將過往6次倒戈戰射入9球，協助拜仁過往三季所有賽事7勝史特加！

除高美斯外，軒歷基斯手上仲有文迪蘇傑、湯馬士梅拿等常規尖刀，相信史特加門將烏里治今晚好難保持不失。史特加尚有卡卡奧、賀蘭等球員受傷，攻擊線只靠狀態時好時壞嘅伊比斯域，令佢哋即使有主場之利都難看好。