皇馬半場細好路
今晚西甲壓軸尾場，長期徘徊下游嘅CF格蘭納達，主場挑戰皇家馬德里。雖然看似強弱懸殊，但「銀河艦隊」經過周中西盃同巴塞激鬥，耗力唔少，C朗等球星未回得切氣，相反CF格蘭納達剛剛換咗教頭，新人事新作風下，眾將一定搏盡冧新帥，況且面對勁旅必以穩行先，初段實同對手鬥磨玩拉布，轉玩「半場細」。

剛周中西盃四強首回合，皇馬喺主場對死敵巴塞搏得好盡，不惜氣力全場壓迫「地上最強」，最終完場前扳平1比1，係佢哋集體努力嘅最佳成果，但眾將耗力甚多，點會咁快回到切氣。預計教練莫連奴會讓周中停賽嘅迪馬利亞及沙治奧拉莫斯披甲，但成班波攰到爆，今仗作客CF格蘭納達，唔好期望佢哋會好似對巴塞踢得咁積極。

格蘭納達頂得兩嘴
CF格蘭納達近況實在唔算曳，之前六場聯賽搶到八分，可惜上仗作客慘吞西維爾三蛋後，即請教練安基拿食無情雞，並由寂寂無聞嘅盧卡斯艾卡拉斯接手，證明高層好唔滿意球隊成績，依家唔敢講CF格蘭納達有冇新帥效應，但球員為保飯碗，一定加多兩錢肉緊。

睇番CF格蘭納達最近六仗主場賽事，全部半場入波唔過兩粒，可見佢哋初段幾守得，今仗趁住皇馬兵疲，必利用體力同對手鬥磨博偷雞，一於捧1.66倍「半場細」。