紅軍曼城性感大肉搏
2013「英超性感王」紅軍又出場，入波又點會少？今輪聯賽利物浦作客曼城，紅軍踢法性感連開11口大，「蘇亞雷斯＋史杜列治」攻無不克，但後防卻曳到喊，有乜辦法唔狂開大？曼城隊長高柏尼續缺陣，「黃金後防」只屬假象，今戰捧大！

自奧雲冒起後，利物浦踢法就以穩守突擊為主，侯利亞時代大打901足球，到賓尼迪斯揸旗，後防仍然好穩陣，前線主要靠費蘭度托利斯同謝拉特入波，點都唔算全攻型。到本季羅渣士掌舵，佢決心將紅軍塑造成「巴塞式」球隊，中前場全民皆攻，一對閘周時殺上前場，咁踢法當然入得又失得啦！今年紅軍踢咗6場全數開大，雖然雷丁亦一樣，但利物浦連大11場，配得起「英超性感王」呢個朵。

利物浦防線好唔掂
雖然新將菲臘比古天奴未有狀態披甲，但蘇亞雷斯本季大爆發，加埋新將史杜列治對辦，上仗作客阿仙奴一度領先兩粒，睇到紅軍攻力幾犀利。但該仗最後幾乎反輸，一句講晒後防唔掂，中堅無論出史卡迪爾、丹尼爾艾格或加歷查，都唔夠快又唔夠頂。足總盃對甲組奧咸，史卡迪爾完全嘜唔住對手個高佬中鋒，賽後羅帥嬲爆，話己隊後防將對手變成杜奧巴，今仗對住迪斯高，紅軍必定出醜。

曼城穩陣係假象
曼城近期走勢不俗，建基於「穩健」後防，近期連盃賽在內5勝1和，竟然1球不失。但細心一睇，除阿仙奴之外對手實力認真麻麻，而該仗兵工廠仲早早踢少1人，曼城保持不失不足為據。事實上，曼城後防重心高柏尼要抖多三周，球隊得番尼史葛同拿斯達錫兩個正中堅，二人均周時「派膠」，好難頂得住對面「雙S組合」。睇埋往績，兩軍近4次對賽3次開大，今場一定要追！