曼城利物浦大戰不設防

巴洛迪利在轉會限期前轉投ＡＣ米蘭，球迷們也不太驚訝，始終在操練場上向文仙尼動粗，「爸爸」都難以忍耐同駕馭其性格，倒不如忍痛割愛。論巴洛迪利球技和埋門能力，相信無人質疑，若果他朝能夠成熟做人，自然會係一粒耀眼球星，惟有祝君生性啦！

冇咗巴神呢把尖刀係可惜，但曼城擁有超強陣容，派迪斯高、大衞施華、占士米拿上陣，仍然可以帶畀對方防線好多麻煩！講開又講，曼城以波輪波，若果有個出色少少嘅領隊，相信成個英超都唔夠佢哋爭。當然今晚曼城雖然實力喺利物浦之上，又有主場之利，但近六次主場面對紅軍只曾兩勝，最重要係後防大將高柏尼仲喺休養之中，實在係可勝不穩。

要利物浦作客贏波，難度又似乎未免太高，始終紅軍後防都唔夠嚴密，例如上周中對阿仙奴連環失球太唔集中，被逼和後甩漏又唔少，今晚就勝在兩隊都係攻優於守，一於推介入球大。