賀英足總150大壽
周中上演多場重量級國際熱身賽，焦點落在「三獅兵團」英格蘭主場迎戰巴西，今仗對雙方各具特殊意義，屬於英格蘭足總慶祝成立150周年重要節目之一，英軍將士自然想贏波攞威。與此同時亦係史高拉利重掌森巴帥印嘅首場比賽，同樣要爭勝打響頭炮，特意召入昔日愛將朗拿甸奴助陣，預料雙方會大踢進攻足球搏錘，捧入球大最啱數。

面子悠關 主場唔衰得
英格蘭足總成立於1863年10月26日，今年剛好150歲，早前公布今年一系列「賀壽」活動，包括兩鬥巴西，先於今晚主場出擊，到今夏再拉隊去巴西報聘。勝負對英足總面子悠關，特別係主場出擊，絕對唔想輸波咁掃興。雖然領隊鶴臣慣用保守戰術，但來到呢種「喜慶場合」應該識做，冇理由再悶親球迷，相信佢會採取主攻戰術，就算最終贏唔到，起碼踢一場悅目好波，好向球迷交代。

事實上，英軍中前場球員狀態大勇，朗尼同禾確特頻頻有波入，後者速度快，正好恰死森巴中堅轉身慢嘅弱點。另外，「雙特」林柏特同謝拉特近期專入靚波，後上重炮隨時射死巴西。不過英格蘭防線缺少泰利後仍處於磨合期，一對中堅搭檔尼史葛同加利卡希爾並唔穩陣，未必頂得住巴西強攻。

史帥念舊情 重召細哨
巴西足總上年11月尾突然炒文奴文尼斯，改聘史高拉利執教，希望佢帶隊明年喺自己國土，重溫02年捧世界盃冠軍美夢。史帥身負重任，當然不敢怠慢，即召入當年8強笠死英軍門將施文嘅朗拿甸奴助陣，加上尼馬、侯克及拉美利斯等骨幹人物，以強陣出擊，爭取首捷。

不過，巴西同樣有隱憂，大衞雷斯有傷上陣成疑，球隊缺乏優質中路守將，失波難免，因此都係捧大為妙。