盧頓英非傳奇再搵「米」路
英格蘭足總盃被視為爆冷溫床，果然非虛，非聯賽球隊盧頓上圈踢走英超諾域治，成為呢項賽事近24年首支淘汰頂級聯賽球隊嘅英非球隊，創造傳奇後，球員士氣高昂信心大增，而且盃賽爆冷往往一不離二，二不離三，英乙巴拉福特殺入英聯盃決賽就係最佳例子。盧頓今圈主場對狀態低迷嘅英冠米禾爾，有力添食，受讓要「讓球主勝」。

盧頓屬於第五級聯賽球隊，無可否認球員斤両有限，但盃賽一場過，球員鬥志士氣往往先至係勝負關鍵。盧頓連英超兵團都搞得掂，可見佢哋對足總盃極之肉緊，越級挑戰成功後，進一步刺激晉級雄心。配合近八場主場七勝一和強勢，對手亦只係米禾爾，盧頓要頂住唔輸，機會樂觀。

米禾爾3連敗讓唔起
米禾爾上圈淘汰阿士東維拉後，表現無以為繼，已連輸三場，而且呢隊波有遇弱愈弱嘅弊病，今季聯賽作客下游球隊錫周三、布里斯托城、葉士域治、班士利，僅得一和三負，切勿高估。米禾爾話晒係英冠球隊，高過盧頓三個聯賽級別，但客W有1.8倍咁筍，熱唔透有暗湧，讓波更加要唔過。