曼城救「細」主降列斯
曼城喺英格蘭足總盃十六強主場撲擊英冠列斯聯，曼城一對中堅高柏尼同拿斯達錫雙雙復出，唔使再用上場條恐怖防線，執掂後防穩中求勝。列斯聯失去王牌前鋒比治奧反撲乏力，大細中位數改成3.5球，要入球細！

億萬大軍曼城上場聯賽對修咸頓遇上尷尬情況，大軍防線中路僅得尼史葛一個正宗中堅，教頭文仙尼被迫以防中查維加西亞串演中堅，結果梗係出事啦，文帥尾段嬲嬲哋以高拉洛夫換走埋尼史葛，西班牙無鋒陣大家見得多，曼城夠膽死整個無中堅陣出嚟，騎呢到爆，唔輸多幾粒算好彩。

列斯聯失王牌射手
曼城聯賽三戰不勝，已被死敵曼聯拋離12分，爭標機會渺茫，可以疊埋心水爭盃。足總盃係文仙尼保命最後機會，若然有乜閃失搞到四大皆空，睇怕佢都會有落台壓力。曼城正選中堅高柏尼同拿斯達錫今場強勢復出鎮守後防，令人放心，但佢哋前面得迪斯高狀態較弗，要狂數對手有難度。

列斯聯今季於盃賽有唔少佳作，聯賽盃踢走愛華頓同修咸頓，喺上圈足總盃淘汰熱刺，不過三場波都有主場之利，今次作客惡唔出樣。列斯聯已放走王牌前鋒比治奧，佢今季轟入16個聯賽入波，佔球隊四成士哥，大軍頓失進攻支柱恐怕無力反抗，只求死守減輕失球數字。