AC撼巴塞旺半場大

歐聯16強之中剩番4隊今晚踢首回合，當中焦點當然放喺意西大戰——AC米蘭主場對巴塞隆拿之上。以門票早早賣晒嘅情況嚟睇，聖西路球場將會座無虛席，預計呢場會係呢個球場今季入座率最高嘅一場比賽。

主隊AC米蘭想爭意甲冠軍似乎仲有一大段距離，因為依家同榜首祖雲達斯相差成11分，中間仲要隔住隊拿玻里！所以我諗AC只要保得住下季有歐聯踢就已經收貨。

今場佢哋新加盟嘅巴洛迪利唔合資格冇得踢，羅賓奴又未康復，得番啱啱傷愈嘅艾沙拉維頂檔，陣容唔算太過完整，睇埋AC米蘭喺歐聯分組賽成績，6戰2勝2和2負，3場主場一場都贏唔到，就算有主場之利都好難頂到「地上最強」嘅巴塞嘞！

少咗韋拿冇影響
人哋巴塞隆拿喺西甲亦已拋離第二位嘅馬德里體育會12分，冠軍獎盃指日可「袋」，依家可以集中精力爭歐聯。另外剛啱嗰場聯賽沙維無份踢，恩尼斯達、佩奧爾同佐迪艾巴都被列作後備，「佩老大」更坐足全場，好明顯為今場留力。另一前鋒韋拿就因腎石問題，需繼續留院觀察冇隨隊。不過，巴塞官網宣布去意大利嘅20人名單，已經夠晒睇頭，對住AC米蘭絕對冇問題。

AC米蘭喺主場贏巴塞已經要數到2004年，入球大細方面，雙方近4次交手有3次開大盤，呢3次仲順利開埋半場入球大添！心水選擇我當然偏向巴塞，但想好分頭，可試「半場大」。