曼城Encore「大」報復
英超獨腳戲由二哥曼城作客護級分子阿士東維拉，維拉近季經常於主場阻住曼城發達，今季仲喺聯賽盃踢對方出局，激死曼城主帥文仙尼，首循環曼城狂數對手洩憤，今次一樣唔會留手。維拉後防長期不穩，今戰預期多士哥，大盤值得捧場。

曼城近年作客維拉經常失魂，對上五次作客維拉淨係上年苦戰險勝一球，其餘四戰兩和兩負，齋睇戰績真係麻麻。佢哋今季喺聯賽盃第三圈主場對住維拉，最後爆大冷出局，激到教頭文仙尼紮紮跳，文帥返到聯賽主場落晒柯打要數對手，班兵做到嘢以5比0大炒維拉，今次兩隊再次碰頭，佢哋仍然唔會手軟。

文帥籲為飯碗而戰
曼城於聯賽被死敵曼聯甩開十五分，爭標機會極微，但為咗面子着想，肯定唔想畀「紅魔鬼」再掟甩。曼城今季成績唔好，今夏勢將換血，主帥文仙尼賽前提醒球員要為飯碗而戰，相信班兵不敢怠慢。大軍續有防線重心高柏尼受傷休戰，未必睇得實對手弗爆前鋒賓迪基，但有阿根廷孖寶泰維斯同阿古路拍住攻堅，大可以攻代守。

阿士東維拉目前護級形勢危急，今次對住勁旅曼城都會全力搏殺，呢班波今季衰在後防唔掂，中堅尼敦巴卡同施亞蘭奇勒經驗不足，呢條嫩口防線頂唔住對手進襲，雙方有機會大手交易，入球大係投注首選。