熱切期待碧咸「大」顯身手

歐聯16強次回合今晚上演兩場大戰，我就熱切期待睇巴黎聖日耳門主場對華倫西亞嗰場，雖然伊巴謙莫域停賽，但有「萬人迷」碧咸睇吖嘛！

碧咸一加盟之後即時有好表現，又同球隊上下相處融洽，真係幫到手！上場喺西班牙踢首回合，雖然嗰場碧咸只係做觀眾，華倫西亞主場又惡氣十足，但聖日耳門一於冇有怕，一樣可以作客靠拿維斯同柏斯托尼嘅入球以2比1取勝，可惜伊巴謙莫域當晚做咗「紅牌阿姑」，今晚喺主場輪到佢做啦啦隊，無得同「萬人迷」同場。

信往績揀埋總入球「3」
聖日耳門家陣係法甲「一哥」，不過就畀里昂追得好貼，上場作客失手不敵蘭斯，唔知係咪個心一早已經飛咗嚟今晚歐聯次回合呢？首回合時已經贏波兼攞到兩個作客入球，今場有主場之利，又有碧咸在陣，理應被睇高一線，晉級八強機會高。

客隊華倫西亞近況唔差，之但係作客唔可靠，本季勝率都唔夠五成，由於之前有主場都要輸波，落後形勢令華倫今晚焗攻，球員肯定唔會有保留啦，好彩中前場冇受到傷兵及停賽問題影響，預料可以「夫添」上陣。對賽往績方面，巴黎聖日耳門兩次都贏到華倫，兩次都係總入球三球。喺有績可尋下，大家可以投法國名牌巴黎聖日耳門信心一票，除主勝之外，入球大以及總入球「3」都值得試。