曼城想爭盃，撞正弱旅實炒鑊甘！英格蘭足總盃八強曼城主場鬥英冠班士利，有乜依郁九成九四大皆空；佢哋又恰慣弱旅，晉級過程共派過七蛋畀兩支英冠仔，班士利護級大過天必當炮灰，曼城「讓球主客和」「-2」捧主勝！

雖然剛擊敗阿士東維拉，但曼城依然落後榜首曼聯12分，要衞冕本季英超冠軍，連細路仔都知冇乜可能。足總盃就係佢哋捧盃最大希望，領隊文仙尼仲想有得撈，就肯定出夫添爭勝。事實上，曼城近期狀態回升，其中泰維斯就搵番對射門鞋，加上耶耶托尼周時上身，同埋大衞施華弗番穿針引線，已經打得番上季八、九成威力。

曼城本季主場成績，當然唔夠上季犀利，但對住弱旅依然好有把握，炒維拉5比0、贈史篤城3蛋；而足總盃晉級過程中，兩次喺自己地頭遇上英冠仔，首先3比0淘汰屈福特，上圈鬥列斯聯，耶耶托尼5分鐘就開紀錄，16分鐘已領先到兩粒，最終大勝四球。班士利實力不及屈福特同列斯聯，相信曼城可以輕輕鬆鬆，大炒一場殺入四強。

班士利一直都係英冠下游分子，本季都係差唔多，目前排緊尾三，護級形勢相當曳。領隊大衞費歷哥夫講到明，依家最緊要都係力保英冠位置，佢哋嚟緊周中要鬥白禮頓，之後就遇上屈福特，兩場對手都強，如果搶唔到分都非常頭痕，所以今場班軍都係當去曼市旅行，同一班頂級球星影吓相就算，大敗都冇乜所謂。