賓菲加平手盤啱波路
今晚歐霸盃16強次回合，葡超一哥賓菲加作客硬撼法甲球隊波爾多。賓菲加坐擁巴拉圭神箭奧斯卡卡度素，絕對夠料喺歐聯爭逐，如今降格踢歐霸盃，猶如虎入羊群，會開出平手盤兼低水，擺明睇好「里斯本雄鷹」可再贏一場，不妨追多鋪。

賓菲加近期可謂喜事重重，經過大半季嘅並駕齊驅後，終於趕過死敵波圖頭升上聯賽榜首，而且勇勢好似有餘未盡，近八仗贏足七場，特別係以奧斯卡卡度素為首，輔以伊度亞度沙維奧、奧斯華度加坦同洛迪高利馬嘅南美攻擊群，入波有如探囊取物咁容易。的確以賓菲加嘅實力，理應喺歐聯有一番作為，但今屆分組賽意外地畀些路迪踢出局，球隊梗係心有不甘，谷埋成肚氣惟有喺歐霸盃場合發洩，從上圈兩回合都贏德甲勁旅利華古遜嘅表現，證明「里斯本雄鷹」對待呢項盃賽非常認真。

波爾多攻力極曳
論戰意，波爾多絕對唔低得過賓菲加，由於首回合輸緊0比1，主帥基洛特呼籲球員要攞出進攻血性，佢認為球隊能創造好多攻勢，但欠缺臨門一腳，特別係一月放走前鋒高法蘭畀紐卡素後，波爾多陷入嚴重嘅入球荒，自二月起近十仗只係入得七粒，咁曳嘅入球能力，仲學人玩搶攻，簡直自取滅亡。