利華「+1」再o趙拜仁

前排拜仁慕尼黑個勢強到好似唔識輸咁，大家捧到佢上天，點知周中一輸畀阿仙奴，全世界即刻倒轉槍頭鬧爆，真係現實。不過，今晚拜仁可能要畀人鬧多次，因為我覺得佢哋作客利華古遜呢場唔易踢，體力上因為周中踢多場亦比對方輸蝕，我今場就會做埋落井下石嗰個，撐利華古遜！

拜仁今季喺聯賽只係輸過一場，正正就係輸畀利華！仲記得係落住微雪情況下，拜仁全場圍住利華攻極都唔入，反而利華只係幾次突擊就得手，最終拜仁主場輸一比二，未能創全季不敗紀錄！

殘兵拜仁有本錢失分
拜仁今季嘅銅牆鐵壁後防近期又好似打回原形，對阿仙奴同上星期聯賽對杜塞爾多夫各失兩球。拜仁聯賽作客成績十一勝一和不敗，但依家正值低潮，係時候博爆冷！何況拜仁已領先第二位嘅多蒙特二十分，輸波對奪標冇乜影響。

作為今季聯賽唯一贏過拜仁嘅球隊，利華起碼心理質素佔優。雖然佢哋近況都曳，上周作客緬恩斯輸波，但返主場都唔係冇得踢，佢哋聯賽主場九勝二和，只輸一場都厲害o架！利華周中冇比賽以逸待勞，加上同第二位嘅多蒙特爭得好緊，戰意一定有。德國國家隊教練勒夫都好關心呢場波，已經公開講過話只要傑斯寧有態，仍然會考慮用佢，希望呢番說話激得起佢嘅鬥志，今晚入到拜仁波啦！

推介：利華古遜 讓球主勝