利物浦喪攻修咸頓等睇入球騷
一見到紅軍，唔使諗喇，追大啦！英超修咸頓主場對利物浦，要估紅軍勝負就難，大細盤就好易捉，佢哋攻到上癮，除蘇亞雷斯為爭神射手獎肯定搏盡外，一眾拍檔如史杜列治都着晒火，挾近期逾9成開大率，勢必繼續做「大王」！

拿仁做咗利物浦球迷十幾年，繼05年奇迹奪歐聯後，現時係最多朋友，會主動捉住小弟談論紅軍嘅時期，一切都因為羅渣士成功改造球隊，將打法轉為超主動、勁有侵略性所致。依家利物浦除一對中堅外同門將外，幾乎全民皆攻，一對「2S組合」唔好講，「老鼠仔」菲臘比古天奴同達寧，再配合格連莊臣、荷西安歷基一對閘作無間攻擊，話佢哋攻足90分鐘絕不誇張，呢種性感踢法令紅軍取得多場大勝，上仗就反勝熱刺3比2，球隊目前士氣如虹。

近14仗開大率超９成
顧得前，後面防守當然會差啲，咁樣喪攻就預咗失球數字上升，難怪紅軍近14場聯賽，開足13場大，比率超過9成。唯一開細嘅一場就係主場吞西布朗兩蛋，但嗰日有睇直播嘅朋友，都知紅軍該仗亦超多入波機會。

修咸頓上仗同諾域治互交白卷，咪以為佢哋係大盤剋星，查實該仗於大雪下進行，冇波入情有可原。再埋「聖人」之前5仗全數開大，其中3場總入球仲唔止3粒，對「曼市雙雄」照有波入，而陣中射手列基林拔近期腳風甚順，所以今戰追大就啱數嘞！