球迷搖旗助威撐伊奧維 

英甲今晚有4場補賽，最矚目係伊奧維主場鬥史雲頓場前列大戰，兩隊目前同得63分，分列5、6位，要爭直接升班仲有價講，雖然伊奧維近況係曳啲，但就勝在球迷同球員都一條心，今晚領隊加利莊臣仲吹雞搵咗幾千位「旗兵」幫拖，擺明對3分志在必得，受讓撐1.58倍「讓球主勝」。

伊奧維連續兩場失分，加利莊臣為谷起球員鬥志特登叫人做嘢，消息話佢哋個「綠白球迷會」已經大手掃入超過3,000支會旗派畀球迷，希望可以幾千人一齊搖旗激勵士氣，身為隊長嘅占美麥亞里士打又點可以令球迷失望吖，呢位左閘上仗鬥卡維尼整親足踝，但就話會打止痛針紮住上，肯定會感染埋班手足加把勁。

史雲頓新帥冇料到
作客嘅史雲頓自從迪肯尼奧劈炮後，6場波總共有4場失分，職業生涯首度坐正嘅新帥奇雲麥當奴唔知係咪有壓力，前日竟然攞班手足出氣，鬧佢哋「練波就天下無敵，落場就無能為力」，今晚點同眾志成城嘅伊奧維鍊吖？