中國大舉撲擊伊拉克
今日除咗世界盃外圍賽、熱身賽之外，仲有亞洲盃外圍賽，C組中國於長沙主場迎戰伊拉克。國足近期戰績低迷，首輪賽事輸波，主帥甘馬曹決定今仗大刀闊斧變陣，甚至可能倣效中超勁旅廣州恒大只踢三後衞，加強中前場攻擊力，誓要全取三分。不過，臨急變陣兼主攻，或會造成防線不穩，令伊拉克有偷襲機會，主W有暗湧，寧博2.45倍入球大。

中國對上一次贏波，已經係上年6月，近6仗僅得2和4負，包括上輪分組賽出閘脫腳，作客1比2輸畀沙特阿拉伯，加上之前熱身賽不敵另一支西亞球隊阿曼。結果甘馬曹早前被中國足協照肺，質疑佢近一年好少改變正選陣容，甚至少徵召新血，是否黔驢技窮。甘馬曹受壓之下，今次即刻召入孫可、周雲、陳志釗三位新人，亦會對正選作出大幅更改。首先，擅長進攻嘅鄭智轉踢防守中場，提升後上攻門力量。

伊拉克射手尤尼斯猛料
前鋒郜林移往左路，楊旭擔任正前鋒，由於郜、楊類型相似，以往甚少一齊披甲，甘馬曹今仗願意派佢哋同時上陣，主攻意圖非常明顯。據悉如果國足上半場未能領先，就會轉用352陣式，進一步提升火力。

伊拉克著名射手尤尼斯仍在陣，呢位30歲前鋒腳法細膩，埋門把握力強，國足壓前進攻，難免會令佢有更多搵食機會。睇番伊拉克近六次作客中國，五次取得入球，開大機會樂觀。