巴塞兵疲「半場細」好路

西甲今晚重新開打，榜首巴塞隆拿作客出戰切爾達，「地上最強」不但有大批西班牙國腳周中同法國踢咗場硬仗，王牌射手美斯亦為阿根廷喺高原比賽踢到嘔，加上有歐聯後顧，教頭維蘭路華難免要作出輪換，初段未入局之下，好難咬得入防守硬淨嘅切爾達，斯維認為「半場細」非常好路。

西班牙周中喺世盃外生死戰險勝法國，眾將搏到好盡，連埋後備入替嘅法比加斯，該仗有八名巴塞球員為「狂牛」披甲，其中兩大主力沙維同柏度洛迪古斯更勇戰受傷，今仗肯定唔使預佢哋。而美斯同馬斯真蘭奴周中亦要為阿根廷作客玻利維亞，喺空氣稀薄嘅高原作戰堅辛苦，個個踢到乸口乸面，美斯返入更衣室時仲頂唔住嘔吐，絕對唔係講笑。

今仗巴塞有養病多時嘅主帥維蘭路華復工，由於聯賽仍lead住皇馬十三分，嚟緊周中歐聯八強仲要作客硬撼巴黎聖日耳門，見到班球員筋疲力竭，預計維帥會作出輪換錫住佢哋，養精蓄銳鬥聖日耳門好過。尾二嘅切爾達深陷護級漩渦，再唔搏命等幾時呀？呢隊波勝在喺主場比賽初段分外硬淨，強如皇馬、馬拉加、華倫西亞等，喺上半場都未能攻破切軍大門，今仗巴塞疲兵兼唔係夫添，隨時迷失主隊嘅鐵桶陣，半場唔慌多波入，「半場細」有1.7倍咪嫌少。

巴塞贊助費冠全球
另外，巴塞近年名利雙收，《都靈體育報》日前將心口及波衫贊助費加起來，統計出單季贊助收入榜，巴塞搵6,300萬歐元排榜首，死敵皇馬排第二。而德國體育研究機構「SPORT+MARKT」則公布「最受歡迎海外球會榜」，巴塞亦名列第一。