車仔死亡賽程爆偈
2013/03/30文:蘇豪
車路士兼顧三條戰線，今晚正式展開九日四戰魔鬼賽程，頭炮喺英超作客修咸頓，車仔今季曾於足總盃作客5比1大炒「聖人」，今場客Ｗ仲有1.92倍，有冇咁筍啊？修咸頓喺普捷天奴接掌後主場專剋強隊，連弗爆嘅利物浦都唔係佢哋對手，依家士氣勁爆，受讓必捧「讓球主勝」！

先講講車路士嘅魔鬼賽程有幾魔鬼，今晚作客鬥完修咸頓，嚟緊周一晚就喺足總盃重賽主場再戰曼聯，周五凌晨留守主場於歐霸盃惡鬥魯賓卡山，尾站係周日聯賽主場對新特蘭，九日四戰，密到黐線！大家唔好忘記，車仔將士啱啱先喺國際賽周東征西討，頻頻撲撲趕返球隊報到，馬上又要準備幾場大戰，真係有氣冇碇抖。

兩日後足總盃撼曼聯
班波踢得咁密，車路士教頭賓尼迪斯部署上必有取捨，相比起兩日後場足總盃大戰，今場聯賽確實冇咁重要，賓帥就算收起部分主力都好合理，正路今場會用費蘭度托利斯攻堅，再安排唔合資格踢歐霸盃嘅丹巴巴亞喺足總盃搏殺。傷兵方面，守將加利卡希爾及中場拉美利斯都有傷在身，未必會夾硬落場，費事傷上加傷。

修頓硬淨「+1」擋車
修咸頓首循環聯賽作客車路士喺落後兩球劣勢下逼和對手，但會方隨即炒咗教頭艾堅斯，一度激發球迷示威抗議。不過，「聖人」喺新帥普捷天奴領軍下演出更上一層樓，先後喺主場戰勝曼城同利物浦，亦曾賽和愛華頓，佢哋勁在可以壓住強隊嚟攻，踢落完全唔似護級球隊，乘勇再戰，絕對有坐和望贏之力，受讓抵玩！

車路士死亡賽程
3月30日 英超 作客Vs修咸頓

4月1日 足總盃8強重賽 主場Vs曼聯

4月5日 歐霸盃8強 主場Vs魯賓卡山

4月7日 英超 主場Vs新特蘭

4月12日 歐霸盃8強 作客Vs魯賓卡山

4月14日 英超 主場Vs熱刺▲

4月18日 英超 作客Vs富咸

4月21日 英超 作客Vs利物浦

4月26日 歐霸盃 4強首回合★

4月27或28日 英超 主場Vs史雲斯

▲足總盃8強如淘汰曼聯，4月14日英超對熱刺將改期，上演足總盃4強戰Vs曼城

★車路士晉級才進行