撐曼城讓球客勝

英超今輪爆發曼市打吡戰，曼聯坐鎮奧脫福主場迎擊死敵曼城，「紅魔鬼」於聯賽拋離次席曼城15分，榜首對決變成面子之戰，曼聯必想雙殺死敵贏到盡，不過，隊中首席射手尹佩斯出現9場入球荒，大軍季尾狀態下滑，讓唔起對手；曼城衞冕機會雖然只餘數字上嘅可能，但無論如何都要盡力阻延死敵提前封王嘅步伐，戰意不用懷疑，「讓球客勝」捧得過！

尹佩斯鬧入球荒
英超尚餘7至8周聯賽，曼聯喺榜首領先15分，球差都多曼城10球，如果今場擊敗曼城，餘下6周領先18分加埋10+球差，基本上已經可以提早開香檳。仲記得「紅魔鬼」上季畀曼城主、客場雙殺，包括喺奧脫福大敗1比6，今次仇家碰頭，曼聯上上下下都想一雪前恥，決心唔成問題。不過有心都要有力，佢哋喺聯賽領先優勢明顯，近仗踢來懶懶閒，對上兩場聯賽鬥弱旅雷丁同新特蘭小勝1粒收工，成班球員態度唔積極，上場足總盃鬥車路士落後時完全撻唔着，結果搞到出局收場。

曼聯接連喺歐聯同足總盃出局，同射手尹佩斯陷入入球荒有莫大關係，呢位荷蘭前鋒上次士哥已經係2月對愛華頓一戰，往後歐聯兩戰皇馬食白果，足總盃兩場砌「車」同樣冇料到，包括上場尾段近門失機，無復勇態。另一進攻重心朗尼啱啱傷愈，喺呢場大戰好難馬上發揮最佳水準。朗尼唔弗，尹佩斯死火，「紅魔鬼」兩個關鍵先生唔掂，就算主場出擊都唔見得有好大優勢，更何況今場佢哋即使贏唔到都無阻佢哋第20次拿下頂級聯賽冠軍，讓波唔多抵玩。

近4次對陣全開大
曼城畀曼聯掟甩成條街，正正係因為季初喺尹佩斯爭奪戰爭輸，佢哋首循環喺主場畀尹佩斯絕殺，一來一回已差6分。曼城將帥都要面對現實，今場為面子而戰，避免被雙殺出到街畀「魔粉」指住嚟笑。

曼城現時僅得中場魯迪維爾養傷，其餘主將都可候命，一對阿根廷射手阿古路同泰維斯拍住上，反擊時鬼死咁快好難對付，預期可撕破對手防線，呢場先揀「讓球客勝」，兩軍近4次喺奧脫福交手全大，可要埋大盤。