祖記拜仁大駁火
歐聯8強次回合，祖雲達斯主場對拜仁慕尼黑，首回合祖雲達斯作客輸兩粒，今次返回主場一定要全力搶攻。對手拜仁今季長期保持良好狀態，去到意大利冇需要縮縮吓，尤其歐聯16強次回合對阿仙奴時出現過驚險場面，拜仁當然唔敢托大，仍會以求勝心態去應付比賽。既然雙方都有心爭勝，戰情應比首回合更加激烈，預料入球唔會少，大盤值得捧場。

祖雲達斯有中場維達爾以及右翼衞列治史迪拿停賽，但對隊形唔會有太大影響。始終祖雲達斯主要目標都係要爭取入球，擺邊個落場都會推前進攻。特別係代替維達爾上陣嘅中場保羅普巴，呢位法國國腳進攻意識較強，更加切合祖雲達斯嘅需要。

實在祖雲達斯攻力唔曳，今季喺歐聯主場對住洛斯查蘭特、主場對車路士及作客些路迪都能交出三個或以上入球，當中最具指標性首推主場以三比○大破車路士，今場有望撕破拜仁防線。黑山射手胡仙歷腳風轉順，剛啱喺聯賽鬥佩斯卡拉梅開二度，今晚可望射破紐亞十指關。

拜仁聯賽封王放手搏
拜仁狀態有幾好唔使多講，淨係左右兩翼列貝利及洛賓，於首回合已經搞到祖雲達斯後場風聲鶴唳，要突破「斑馬兵團」嘅三人防線話咁易。基於今場主隊會壓得好前，勢必令拜仁有更多空間去組織攻勢，入球隨時比首回合來得更加容易。要留意拜仁已經奪得聯賽冠軍，球員喺冇顧慮下一定踢得更放，作客一樣有能力取得入球。

出線條件
祖雲達斯晉級

‧淨勝3球或以上

‧勝2比0，需要加時

拜仁慕尼黑晉級

‧勝或和

‧以1球差距落敗

‧以2球差距落敗，但取得作客入球

‧輸0比2，需要加時

數讀歐聯
今次係祖雲達斯第7次打入歐聯八強

拜仁作客意大利的戰績為5勝3和9負

祖雲達斯20次主場對德國球隊贏了14場

拜仁於歐洲賽曾47次於首回合領先，只有8次未能晉級