拜仁-2瘋狂屠狼

剛創下德甲十二連勝紀錄嘅拜仁慕尼黑今晚轉戰德國盃4強，主場對「狼堡」禾夫斯堡。拜仁今季演出無懈可擊，閃電奪得德甲冠軍，歐聯亦躋身4強，加上德國盃，「三冠王」叫緊胡，對於呢個「盃仔」志在必得。教練軒歷基斯上仗聯賽特意收起九位正選，無非為養精蓄銳，一舉擊敗禾堡闖入決賽，奠定「大滿貫」次關奪標基礎。禾夫斯堡積弱多時，仍處於重建時期，硬撼拜仁猶如螳臂當車，難逃大敗，拜仁「-2」照捧「讓球主勝」。

半年前問邊隊係當今最強球會，相信好多人會答巴塞隆拿，現時再問，應該唔少人改答拜仁，呢支德甲霸權今季氣勢比「地上最強」有過之而無不及，巴塞缺少美斯，實力即大打折扣，拜仁勝在整體人腳平均質素高，上仗聯賽以九位副選上陣，都大炒紐倫堡4比0，實在非常犀利，唔好忘記紐倫堡聯賽排名仲高過禾夫斯堡，但教練軒歷基斯講明絕對唔會輕敵，今仗精銳盡出全力爭勝。

軒帥圖橫掃名留青史
事實上，軒歷基斯極渴望為拜仁奪得「三冠王」，事關佢表面上話教完今季退休拒絕續約，但實際上係會方無意留用佢，一心邀請星級少帥哥迪奧拿接手。軒帥內心難免有條刺，更加渴望創下宏業，令哥帥難以超越佢，自己成為球迷永遠懷念對象，絕對有理由相信軒歷基斯會下令球員盡炒禾堡。

禾夫斯堡作客拜仁輸晒
禾夫斯堡自08/09球季爆冷捧德甲冠軍後，不斷流失主力，甚至一度淪為護級分子。球隊依家靠奧歷、迪亞高等「失意軍人」帶住一批年輕球員，實力同拜仁相差兩三班波，可以打入4強，已算超額完成，相信唔敢奢望淘汰拜仁，而且佢哋近十三次作客拜仁全敗收場，球員睇完呢個數據，信心都冇咗一大截，淨輸三球屬最低消費。

近10次交鋒 拜仁僅1敗
拜仁近年可算係禾夫斯堡剋星，近10次交手拜仁一共取得8勝1和1負，唯一輸波係08／09球季，禾夫斯堡曾於主場大炒拜仁5比1，禾夫斯堡該季最後亦取得德甲冠軍。如果單計主場，拜仁近13次對賽全部贏晒，但如果以中位數3.5球計，近5次交手只有1次開大，對上4季拜仁主場鬥禾夫斯堡總入球都唔超過3球，值得留意。