韋根自救奮起圍城

英超周中快車提前預演足總盃王者戰，曼城主場迎戰韋根，兩隊下個月會喺溫布萊爭冠，韋根現時先要專注完成護級任務，佢哋一向都係唔見棺材唔流眼淚，今季再次喺季尾撻着狀態，踏入2013年作客只輸一場，好鬼硬淨！曼城主勝熱到燙手冇投注價值，韋根狀態托弗，頂盡小敗，推介「讓球和」同「讓球客勝」，自製受讓球半盤，就算韋根輸一粒都有錢收！

韋根暫列尾三，落後十五至十七位球隊三分，但打少兩場，形勢唔算太差。若果大家有留意開呢班波，相信都會發現佢哋季尾演出特佳，大軍今季大部分時間身處下游，近期又發力，對上三場聯賽兩勝一和，包括上場聯賽喺護級關鍵六分波逼和昆士柏流浪，直接打擊對手士氣。韋根踏入2013年作客好堅，聯賽連盃賽十戰只係輸過畀車路士，仲試過喺足總盃作客大炒愛華頓三比○，喂，「拖肥糖」喎，就算強如曼城都唔係話炒就炒啦！

重演上季凌厲後勁
韋根三五二陣式愈踢愈成熟，兩個翼衞保斯同包爾斯亞體力驚人，助攻助守效率超高，前線射手干尼就梗係有級數啦，近排仲打起埋年輕前鋒卡林麥馬拿文，依家班波攻守兼備，踢落完全唔似下游球隊，千祈唔好畀佢哋個排名呃咗啊！韋根勁起上嚟真係唔係人咁品，上季曾於主場戰勝曼聯，作客砌低埋阿仙奴，當時有邊個估到佢哋咁堅吖！韋根今場又被睇低，現時客Ｗ有成12倍，要贏係有難度，但並非不可能嘅任務囉。

曼城奪標無望有保留
曼城喺聯賽打少場落後榜首曼聯十五分，難望重溫上季奇迹奪冠美夢，教頭文仙尼多番表明投降絕非扮晒嘢。曼城季內唯一目標係爭奪足總盃冠軍，今輪巧遇決賽對手，為免韋根使出殺傷戰術傷及主力，文帥好有機會收起部分主將，特別係中場指揮官大衞施華傷緊，射手阿古路好番冇耐，無謂搏得太盡。曼城近五次主場對韋根四勝一和冇失波，有兩場大勝三比○，另有兩戰小勝一粒，一場互交白卷，韋根乘勇搶分護級，大敗機會唔高。

曼聯、曼城餘下賽程
曼聯

23/04/13 主場 Vs 阿士東維拉

28/04/13 作客 Vs 阿仙奴

05/05/13 主場 Vs 車路士

12/05/13 主場 Vs 史雲斯

19/05/13 作客 Vs 西布朗

曼城

21/04/13 作客 Vs 熱刺

27/04/13 主場 Vs 韋斯咸

04/05/13 作客 Vs 史雲斯

12/05/13 作客 Vs 雷丁

19/05/13 主場 Vs 諾域治

待定 主場 Vs 西布朗