曼城韋斯咸演入球騷

季尾判波，最緊要係睇對賽雙方鬥心，如果大家都冇嘢好爭，兩隊會點樣去對待場波？今晚英超早場曼城主場對韋斯咸，主隊衞冕失敗，客軍亦冇護級煩惱，兩軍冇晒心理包袱，料可製造大量入波，捧大！

喺英超嚟講，曼城球員質素極高，泰維斯、阿古路數胡能力強，最近連拿斯尼都打番起，就算大衞施華繼續養傷都影響不大。韋斯咸狀態好亦入到波，加上有湯堅斯同佐治麥卡尼兩名後防缺陣，今場係入球騷。

九流球證搞彎歐聯大戰
英超冠軍誰屬已經揭曉，故出現唔少例行公事，但另一邊廂歐聯卻殺入直路，但喺拜仁主場對巴塞呢場巔峰對決中，卻出現一流戲碼、九流球證。呢場拜仁其中兩個入球，都明顯越位同犯規在先；巴塞中堅碧基兩番於禁區犯手球，球證都發雞盲睇唔到。

係人都會犯錯，球證都係人，出錯係在所難免，但如果犯錯次數太多、太低級，就唔可以容忍。今戰上半場碧基頻頻「打排球」已經離譜，而拜仁第二個入波，馬里奧高美斯凸出晒明顯越位在先，第三球洛賓建功前，湯馬士梅拿亦撞到佐迪艾巴一仆一碌，亦肯定係犯規。

其實今屆歐聯已出現好多爭議性入波，齋計8強賽事，伊巴謙莫域、C朗入波前已經越位；多蒙特次回合贏馬拉加3比2，更出現兩個越位入球。錯得咁多、錯得咁密，真係醜死鬼，歐洲足協又點可以坐視不理？