英超季尾邊隊最好賭？梗係富咸啦，長反佢哋執到笑！呢隊「Hea踢王」近6場聯賽輸5場，球員已經當放暑假，今輪主場對利物浦，紅軍一班後生仔鬥心不俗，捧客W！

去到四月頭，富咸已攞咗39分喺手，傳統上喺英超手揸40分已經好穩陣，降班威脅微乎其微，既然位列中游，當然無欲無求，陣中個個球員都學晒「Hea碧」貝碧托夫Hea得就Hea，跟手6場只係和過阿士東維拉，其餘5場輸晒，同之前表現判若兩隊。

紅軍已肯定緣盡來季歐洲賽，故有傷嘅兩大主力謝拉特同丹尼爾艾格今仗都會避戰，「哨牙蘇」亦繼續停賽。雖然冇嘢好爭，但球隊內部位置競爭激烈，史杜列治、波連尼、菲臘比古天奴、佐敦軒達臣等後生仔，仍須以表現證明自己，今場贏得。