曼聯領隊費格遜急流勇退，最近各地球迷熱話。始終費Sir都成七十一歲，退休只係時間問題。費格遜喺曼聯執教超過26年，為球隊贏唔少獎項，Peter相信好難有人可以複製到佢嘅成就，唯一可以抄嘅就係費Sir執教手法及智慧，所有教練及領隊都值得向佢學習，當中有幾個要點Peter特登攞出嚟同大家分享。

第一係白手興家，費格遜當年執教嘅曼聯只係中型班，但今日就留低一支冠軍級球隊畀大家。Peter可以大膽咁講，曼聯本身已有齊爭標能力，莫耶斯只要做好本分，贏多一至兩次聯賽冠軍唔係難事。

第二點係青訓，費格遜上任後知道球員平均年紀偏高，所以加強青訓為球隊未來鋪路，及後更培養出七小福。

第三點係用人以球隊利益為先，大家都知曼聯兩位場內領袖簡東拿及堅尼都係火爆人物，不過費Sir唔會因脾氣壞就唔用佢哋，只要對球隊有益處，佢一定有辦法處理好其他問題。

第四點係觸覺，費格遜比任何英倫三島領隊，更加緊貼足球潮流，唔會一套戰術用到老，呢點就令曼聯到喺歐洲賽取得好成績。特別係輪換及陣容調配方面，費Sir每一步棋都係有針對性，並非為換而換。

第五點係使錢有分寸，費Sir唔係唔使錢，但緊守應使則使嘅原則。好多時球員未紅就已經買入，到佢走下坡就將佢出售。如非格拉沙累事，曼聯負債率唔會咁高。

第六點係費Sir對任何人都面面俱圓，唔會令曼聯蝕章。

第七點係佢識得喺適當時間做適當決定，今次退休就係最佳例子。佢唔會賴死唔走，博賺多幾百萬鎊年薪。