韋根擺幾維告別英超

英超今日煞科，主要得番歐聯席位有得爭，雖然競爭性唔係好高，但呢個賽事始終都有好多捧場客，相信整體投注額會唔錯，預期可以製造一個小高潮。今次睇中場英超下游對決，韋根主場對阿士東維拉，主隊季尾長期見勇，讓波照捧！

薩拉戈薩護級打「包」
韋根慣性喺季尾嚟料，今季仲捧埋足總盃，可惜喺聯賽太遲發力，最終未能收復失地，以呢班波人腳，若能留住大半隊主力，下季喺英冠可以打橫行！呢場本來係護級關鍵戰，依家變成例行公事，但韋根喺自己地頭出戰，點都想贏番場光榮告別英超，維拉上咗岸唔會阻頭阻勢，捧上盤。

同日西甲薩拉戈薩主場對畢爾包，主隊仲要搶分護級，呢班波去到季尾好正氣，場場都搏畀你睇，喺主場出擊仲特別肉緊，已經接連贏波，今次對住風流球隊畢爾包，講氣勢薩拉戈薩一定贏晒，戰意又好啲，讓到半球個盤好硬淨，預期可以順利贏波，要上盤！