小保加紐維爾吼半場和

明早繼續上演南美自由盃8強首回合，阿根廷球隊內訌，小保加主場對紐維爾舊生。論兩隊今季聯賽成績，小保加輸成幾條街，依家淪落排尾三，反觀紐維爾舊生高踞榜首，似乎贏面甚大。不過踢盃賽又係另一回事，尤其係小保加屬於自由盃專家，絕對唔可以小覷。從莊家開平手盤，和波賠率更低至2.8倍，足見係一場五五波，估計雙方上半場應會踢法保守，睇定來踢，以免犯錯，不妨考慮1.85倍半場和。

小保加曾六奪自由盃冠軍，上季聯賽表現一般，但都能打入自由盃決賽，難怪即使今季喺阿甲成績低落，莊家都唔敢睇小佢哋。事實上，小保加主場表現硬淨，近七次主場不敗，僅失兩球。佢哋問題係攻力欠佳，只喺靠晒32歲老將辛迪亞高馬田施華入波，想咬入對手唔易。

紐維爾舊生人腳鼎盛，擁有前阿根廷國腳麥斯洛迪古斯同軒斯，前者曾効力利物浦而後者更曾効力過曼聯、皇馬等勁旅，踢出佳績合理。不過今仗始終係首回合兼作客，預料紐維爾舊生唔敢冒進，力求首回合不敗，喺次回合返主場贏波晉級，估計戰局將處於拉鋸，半場更難分勝負。

明尼路受讓「筍」
另外一場自由盃8強首回合，墨西哥球隊迪祖亞拿主場對巴西球隊明尼路，明尼路星光熠熠，擁有朗拿甸奴、祖奧、基拔圖施華，呢班巴西兵以前在國家隊夾慣夾熟有默契，實況係佢哋今屆踢咗八場自由盃賽事，取得七勝一負極佳成績，唯一敗仗只係一場分組賽而且係例行公事，論牌面及真正實力都遠在迪祖亞拿之上，讓球主客和今次有得受讓，可捧「讓球客勝」。

兩隊近6次對賽成績
日期 賽事 賽果

16/11/2012 阿甲 小 保 加 0:0(0:0) 紐維爾舊生

27/02/2012 阿甲 小 保 加 2:0(1:0) 紐維爾舊生

22/08/2011 阿甲 紐維爾舊生 0:1(0:0) 小 保 加

30/05/2011 阿甲 小 保 加 1:0(0:0) 紐維爾舊生

29/11/2010 阿甲 紐維爾舊生 1:0(0:0) 小 保 加

06/02/2010 阿甲 紐維爾舊生 4:2(3:1) 小 保 加

註：前者主場