國際熱身賽意大利主場對聖馬力諾，今場比賽將會安排喺博洛尼亞進行。話就話有主客之分，但其實聖馬力諾都喺意大利境內，地理因素對客隊可謂影響不大。大家都知兩隊實力有好大差距，但因雙方關係密切，意大利就算超晒班，今場肯定會「點到即止」，唔會大炒對手令「兄弟國」冇面。今場讓球主客和方面意大利「-5」實在太多，推介「讓球客勝」。

（now633周六凌晨2時45分直播）

意大利每逢遇到關係密切球隊總係留一手，近期一個好例子就係三月份舉行嘅世界盃外圍賽，意大利對戰鄰國馬爾他，當日意大利喺上半場取得兩個入球後就「收工」，最終都係贏二比○。預料今次對聖馬力諾都唔會太過進取，意大利穩定局勢之後就會拖慢節奏嚟踢。再講，幾位當弗球員如巴洛迪利、艾沙拉維及巴沙利都有傷，前兩人肯定無緣上陣，對於意大利以大比數取勝構成阻力。

聖馬力諾隊中有唔少國腳都係意大利人，比如喺羅馬出生嘅隊長安迪施華及中場柏拉斯茲，就連教練馬沙都喺熱拿亞出生，並非土生土長嘅聖馬力諾人。既然兩隊都算係自己友，意大利又點好意思大炒對手呢？反正熱身賽缺乏競爭性，意大利「勒住踢」都唔出奇，捧「讓球客勝」就最好。