本季是「德甲聯賽50周年」，如斯隆重的階段性，能夠以歐聯獎盃作賀禮，真係有冇嚟得咁着時呀？但這就肯定是德國足球勝利？醒醒吧！「本季」德甲確是盛世，可是，仍只足夠做「阿四」矣！

在歐聯歷史中，西班牙球會共13次奪冠、意大利球會12次、英格蘭球會12次、而德國計埋今屆都只係得7次。就算只計改制之後時期（91-92開始，從分組至淘汰模式），這排名也沒法改變，德甲都係排第四！ 

德甲目前只係兩強鼎立，就以本屆歐霸盃為例，4支德甲隊利華古遜、史特加、漢諾威、慕遜加柏均打入32強，但去到16強只剩下史特加，特別看過從歐聯分組第3跌落歐霸的賓菲加怎樣壓倒利華古遜，兩者間技術上分野實在不少！

但要注意，「德甲50年」說明其實只係一個十分年輕嘅聯賽，建基發展相比前三位英格蘭、意大利、西班牙等幾乎少了足足一倍時間，偏偏德甲在第二個十年（七十年代）便能達至每年至少有一支球隊進入那時歐洲三大盃賽的準決賽、共7奪冠軍之盛況空前！（1980年歐協盃，即歐霸前身，四強竟全是德國球隊，分別是拜仁、史特加、慕遜加柏、法蘭克福，這項紀錄絕無僅有！），「短短」時間，已有難能可貴之成績，又有誰能輕視其潛力？目前，德國人才輩出，是第一關鍵；聯賽球會穩健財政，是另一要素，加上擁有全歐最高入座率，以及歐洲第一經濟體系支持，德國起飛指日可待！

令我更感興趣是，拜仁如此財雄勢大，「德超」將成為一個愈來愈具說服力之名詞？這是球迷們另一個要注視的！一切，就從本屆歐聯決賽開始。