今晚世盃亞洲區外圍賽B組，日本坐鎮主場迎戰澳洲，日本上周喺熱身賽對住保加利亞輸得肉酸，今仗點都要做番啲嘢氹粉絲，唔會甘於和波出線咁衰仔，況且「袋鼠兵」下仗仲要火併出線勁敵約旦，無謂同日本硬碰，不妨直取主勝。

（now 671及672周二晚6時30分直播） 

雖然上仗熱身賽對保加利亞，日本主帥沙哲朗尼並非精銳盡出，但成隊波踢來毫無生氣，門將川島永嗣仲將對方直射嘅罰球「彈琵琶」送入網，咁樣送禮輸波，搞到沙帥冇晒飛士。

講番今場波，「東瀛兵團」只要打和澳洲，便可殺入明年巴西世盃決賽周，照計唔會去盡，但「瀛男」一向自尊心重，受到輸畀保軍嘅刺激，眾將都想喺國民面前踢番場好波，鬥心唔使懷疑。 

澳洲實力今非昔比，仲要靠去咗美職養老嘅卡希爾擔大旗，卡希爾嘅前線拍檔約舒亞堅尼地喺名古屋鯨魚表現大跌Watt，今季入得三粒咁大把，同以往相比差天共地，難怪佢哋依家喺B組只係排第三喇。

好彩連埋今仗，澳洲仲有三場未踢，包括下周二喺主場硬撼次席嘅約旦，其實「袋鼠兵」只落後約旦一分，計過度過，與其同來勢洶洶嘅日本硬碰，倒不如留力同約旦搏命好過喇，今仗一於力撐日本。