巴甲冇咗尼馬，號召力難免削弱，佢間母會山度士進入「後尼馬時代」冇厘神氣，「開咧」後三戰未贏過，今仗作客新升班嘅基斯奧馬，竟然有得受讓，明顯被莊家睇淡。基斯奧馬屬於典型「地頭蟲」，各項賽事夾埋近八次主場出擊，取得七勝一和，經過兩輪作客落敗後，谷埋一肚氣，返回自己地頭隨時大爆發，阿King捧主Ｗ。

（周四早上6時30分開賽）

山度士近年可以話係尼馬嘅「一人球隊」，佢喺「開咧」前夕落實轉投巴塞，即時令球隊士氣嚴重受挫，今季首輪巴甲鬥法林明高，就算尼馬搏晒老命，希望喺告別戰贏波，但一班隊友明顯冇厘心機，結果悶和收場。跟住作客保地花高，仲全失3分而回，上仗亦僅靠博到12碼逼和甘美奧。睇怕山度士未搵到新領袖之前，好難反彈。

至於基斯奧馬雖然兩連敗，但要留意兩場都係作客，而且對手係實力份子國際體育會及上季冠軍富明尼斯，實屬非戰之罪。其實基斯奧馬主場發揮一向唔錯，開鑼戰擊敗巴希亞，加埋州聯賽及巴西盃，佢哋近八次主場七勝一和，絕對「唔嘢小」，今場正好趁山度士六神無主，殺對手一個措手不及。

另一場聖保羅自南美自由盃出局後，專心踢聯賽，以前巴西國家隊前鋒主力路爾斯法比安奴及中堅盧斯奧為骨幹，配合艾萊斯奧，球隊狀態大勇，主場炒得起戈亞斯，要「讓球主勝」。另外，帕拉尼恩斯踢法有前冇後，作客邦迪比達，大盤屬首選。