中國隊冇份踢世界盃外圍賽，趁國際賽空檔，安排一連十日踢三場熱身賽，首仗今晚主場對烏茲別克，國足主帥甘馬曹徵召九位廣州恒大（足智彩譯：FC廣州）球員入伍，擺強陣務求省靚金漆招牌。反觀，烏茲別克下周中仲有世盃外圍賽生死戰，今場唔會嚟真，國足主W有2倍抵玩。

（中央5台周四晚7時35分直播）

中國上圈世界盃外圍賽已出局，甘馬曹保得住帥位，算執番身彩，但面臨嘅壓力愈來愈大，因此即使踢熱身賽亦不敢怠慢，召入所有精銳，中超班霸廣州恒大佔其中九人，包括鄭智、孫祥、郜林、馮瀟霆、張琳芃等，佢哋夾慣夾熟，夠晒默契可以迅速入局。

雖然賽前有消息指鄭智及孫祥今仗獲准休息，但仍有趙旭日、趙鵬及于海等主力，人腳仍然夠殺。國足跟住仲要對勁旅荷蘭，一於先攞烏茲別克祭旗壯聲勢。

另一邊廂，烏茲別克喺世界盃外圍賽A組，同榜首南韓同分，僅領先第三位嘅伊朗1分咁大把，下周二作客南韓，屬於爭出線「6分波」，不容有失。

預料烏軍今仗應會就住踢，避免受傷及消耗過多體力，甚至乎踢完上半場就大輪換，唔會太在乎賽果。烏茲別克兩年前作客中國，以0比1落敗，今次有保留情況下，輸波機會更高，國足主W分頭十足，值得捧場。