世界盃南美洲區外圍賽戰火重燃，其中主場嘅阿根廷將於首都布宜諾斯艾利斯河床球場迎戰哥倫比亞，賽事焦點當然係阿根廷球王美斯同哥倫比亞射手「老虎」法卡奧嘅大鬥法。阿根廷現以11戰24分排榜首，領先次席的厄瓜多爾4分但多打1場，今仗必欲藉主場之利爭勝以鞏固榜首位置。哥倫比亞暫以10戰19分排第3，球隊於2011年11月的主場都輸畀阿根廷，今仗作客更難踢，一於捧美斯成功打老虎，阿根廷主場奏凱歌。

（有線61及201周六早上6時05分直播）

阿根廷喺世界盃南美洲區外圍賽表現出色，自2011年10月作客委內瑞拉輸波後，已連績9戰未嘗一敗，當中更取得6勝3和佳績，其中主場更錄得4連勝，可見球隊於自己地頭出戰分外醒神。効力西甲巴塞隆拿的阿根廷前鋒美斯，雖於聯賽因傷缺席季尾西甲賽事，但一直積極進行康復治療，最終趕及入選阿根廷大軍名單。 

近日剪短頭髮以清爽一面示人的美斯，連日內皆有於球隊訓練場出現，隊友馬斯真蘭奴等更力撐他完全冇問題可正選上陣。阿根廷主帥沙貝拉相信亦非常清楚美斯的情況，今仗主場出擊一定會對他委以重任，再配合阿古路及希古恩組成的攻擊「三叉戟」，阿根廷絕對有力於主場再贏一仗。

哥倫比亞今仗雖有星級射手法卡奧壓陣，但球隊於南美洲區外圍賽作客表現麻麻，近3仗客戰輸咗2場，上仗負實力不強的委內瑞拉表現更難睇，球隊客場表現實在令人擔心。

此外，哥倫比亞2011年11月於主場對阿根廷都要輸，雙方實力明顯有距，今仗作客有美斯強勢復出的阿根廷，贏波機會甚微，一於強捧阿根廷主W。