今晚世盃外歐洲區Ｅ組賽事冰島主場對斯洛文尼亞，小組第二主場對包尾大幡都開平手盤，大家已經睇到呢場有玄機，斯洛文尼亞球員級數就比較高，如今得到被譽為國家隊歷來最好教練卡坦歷領軍，球隊表現脫胎換骨，今場作客一樣坐和望贏，平手盤撐斯洛文尼亞。

（周六凌晨3時開賽）

斯洛文尼亞雖然包緊尾，但只落後次席嘅冰島6分，出線尚未絕望，首循環主場對冰島雖然輸1比2，但當日其實佔盡上風，偏偏客軍熱刺中場基菲爾施古臣上晒身，兩次機會畀佢搞掂晒。斯軍自從由卡坦歷接任領隊後，成隊表現都生晒，上周熱身賽半力作客贏土耳其2比0，表現流暢可人，令今晚作客對冰島盡地一煲嘅信心大增，憑大宮松鼠嘅路華高域同燕豪芬嘅馬達夫斯呢對當弗雙箭頭數胡，有力坐和望贏。