仲有幾日就係端午佳節，挪威U21一班小將，秉承住佢哋祖先「維京海盜」嘅強悍戰鬥格，力爭上游，喺U21歐國盃A組第2輪決戰英格蘭U21，將施展混身解數撐起「維京龍舟」，力圖「搶劫」呢支名大於實嘅名牌，提早歡度佳節！至於英軍主帥皮雅斯冇牙力召唔到大國腳入伍，今次只能派二線人腳出戰，首戰輸畀意大利後已滿腹牢騷，中立場又冇優勢，仲要讓波當然必反，直取挪威「讓球客勝」！'

（now 633及635周日凌晨零時直播）

挪威U21陣中冇乜大牌球星孭飛，但首戰壓住東道主以色列狂攻，中前場推進暢順，射手馬古斯柏達臣喺前線勁搶鏡，啱啱被大國腳徵召嘅箭頭祖舒亞京治及中場洛特維迪等主力都會盡趕歸隊，成班波一條心搏殺。

大軍上仗早於上半場有左閘希頓史達被逐，打少個都不落下風，尾段憑中場星治建功扳平，盡顯鬥心，班兵難得出到歐洲大舞台，實會爭取表現希望轉去大球會搵食，更何況目前只得1分在手，最後一輪仲要面對全組最勁嗰隊意大利，因此今仗對英格蘭絕對唔輸得。

另一邊廂英格蘭U21氣氛極曳，教頭皮雅斯不滿足總冷落小國腳，唔畀佢召入菲臘鍾斯同韋碧克等合資格猛將，連喺外圍賽受到重用嘅阿歷士張伯倫都撬走埋，令球隊爭標實力受削。英軍首戰對住意大利進攻冇板斧，又被英傳媒插到體無完膚，今仗有曼聯新兵韋費特沙夏及恩斯阿仔湯馬士恩斯復出，預期側擊力會有提升，但佢哋前線始終缺少可靠射手，域咸同蘇杜爾都非大將之才，靠佢哋去撕破挪威硬淨防線絕非輕易！

兩隊曾於外圍賽碰頭，英格蘭曾主、客場雙殺挪威，照秤級數係高啲，但今時唔同往日，英軍家陣少咗猛將阿歷士張伯倫幫手，戰鬥力大減，搶W難度高，預期拚勁十足嘅挪威至少可以保住唔輸，「讓球客勝」捧得過。

上仗挪威U21喺踢少一人嘅劣勢下，以2比2逼和東道主以色列U21，其中喺補時階段為挪威扳平嘅星治值得留意。呢位出生於奧斯陸嘅印度裔防守中場，入選過挪威U15至U21各級別嘅青年梯隊，並喺老牌球隊華拉倫加嶄露頭角，曾於熱身賽對巴塞入波後，被當時仍教緊「地上最強」嘅哥迪奧拿讚不絕口，上季星治改投荷甲飛燕諾，其腳下功夫秀麗，被喻為「挪威恩尼斯達」，目前挪威U21正值用人之際，呢粒「印度之星」喺今屆賽事有望一炮而紅。