世界盃非洲區外圍賽第2圈賽事，已經殺入直路，各支名牌要進身下圈，就冇得再hea踢。「H組雙雄」馬里同阿爾及利亞，正為榜首爭餐死，今輪分途鬥盧旺達與貝寧，馬里有施度基達、沙馬沙等大將壓陣，主場遇魚腩啱胃口，捧「讓球主勝」。

（周一凌晨2時開賽） 

提起非洲波，好多人會諗起科特迪瓦、尼日利亞同喀麥隆，但馬里實力亦不容忽視。今年一月非洲國家盃，馬里殺入四強僅不敵最後冠軍尼日利亞，季軍戰清脆殺敗加納，反映呢班波絕對唔可以睇小。 

事實上，馬里中後場非常穩陣，而且好有隊形，隊長施度基達雖然已33歲，但喺非國盃都頻頻入波，證明呢位前巴塞球星仲好踢得，另外基爾禾前鋒沙馬沙亦好氣好力，有埋佢在陣火力絕對有保證。盧旺達於小組3戰得1分，早前作客吞阿爾及利亞4蛋，今場真係輸少當贏。

根據賽制，非洲區第2圈分組賽10組，只有各組榜首可晉級，依家馬里同阿爾及利亞同分，嚟緊場場當決賽踢。今輪阿軍作客鬥貝寧，都照以3分為目標，佢哋更特別徵召「西甲雙星」菲侯利同巴謙美助拳，平手盤捧得過。（周日晚11時開賽）