巴西約咗法國拍跳，兩隊重演98年世界盃決賽翻版戰，近日又傳出法國當年靠禁藥贏世盃，雙方喺敏感時刻碰頭，法軍當然想打番場爭氣波，不過，佢哋近期遇強即屈，今戰硬撼森巴兵團欠鬥攻本錢，只能死守齋頂，玩細盤最好。 

（周一凌晨3時開賽）

法國98年大炒巴西奪取世盃冠軍，當年隊醫費雷隔咗十幾年先踢爆有球員當年用禁藥，令法國足球形象受損。撇除禁藥醜聞，法軍近期戰績平平，三月尾喺世盃外硬撼西班牙落敗，早前同烏拉圭拍跳又輸，今次缺少列貝利同拿斯尼等創造型中場，要爭取士哥難度甚高。

至於巴西最近於熱身賽演出亦麻麻，世界排名已跌至22位，冇晒飛士，大軍近兩戰先後同智利及英格蘭踢成二比二，後防甩漏甚多。教頭史高拉利強調今戰唔會大變陣，射手李安度達美奧受傷缺陣，已經補選祖奧頂上，前面預計會以尼馬拍侯克。巴西前線發揮冇問題，但對手今戰會縮後死守，佢哋要撕破密集防守非易事，相信有排搞。 

兩隊04年至今先後三次交手，法國取得兩勝一和未嘗敗績，而且仲要冇失波，三場同樣開出細盤，仍然剋住巴西，今戰主勝偏熱，熱而不穩，不如試細盤。