世界盃南美洲區外圍賽今輪焦點必屬厄瓜多爾主場對阿根廷，球迷都好關心美斯今仗能否披甲，但就算呢位巴塞巨星上陣，恐怕對阿根廷幫助亦有限，一來佢狀態不足，二來面對厄瓜多爾高原氣候，戰鬥力勢必大打折扣。預料阿軍主帥沙貝拉會採取「拉布戰術」，減慢球員體力消耗，等待機會給予對手致命一擊，Mic少相信入波唔會多。今仗首選入球細，要博高回報可考慮埋2倍「半場和」。

（中央5台周三清晨5時直播）

美斯剛傷愈冇耐未操起狀態，上仗外圍賽對哥倫比亞，佢主動要求先任後備，下半場先上陣，表現明顯喺水準之下，賽後更承認今場未必踢到。除此之外，阿根廷仲要同高原氣候搏鬥，厄瓜多爾主場位處2,850米高海拔，空氣稀薄令客軍難以適應，對體力負荷特別大。

阿根廷三月尾作客另一支高原球隊玻利維亞，美斯、迪馬利亞等球星踢到嘔，幾乎斷氣咁滯，幾經辛苦逼和1比1，有晒辦畀大家睇。領隊沙貝拉吸取教訓後，今仗唔會冒進，以免被對手放乾。事實上，阿根廷高踞榜首，出線機會高唱入雲，今仗唔輸已達標。厄瓜多爾地利優勢明顯，但球隊近況欠佳，想入波亦唔易，睇番佢哋近五次主場對阿根廷都開細，四次上半場互交白卷，诚意推介細盤及「半場和」。