洲際國家盃正式開波，兩組合共八支球隊，每隊都有看點。就算係大洋洲代表大溪地，一樣有值得大家欣賞嘅地方。每次提起大溪地，個個都會諗起靚女藝人官恩娜，但Peter可以同大家講，大溪地唔淨只有官恩娜，佢哋仲有獨特嘅足球文化，有機會再同球迷分享。

揭幕戰由主辦國巴西對日本，基於巴西屬世界盃主辦國，唔使踢外圍賽，國家隊缺乏具競爭性嘅比賽去練兵，所以佢哋一定會借助洲際國家盃去提升作戰狀態，好好準備2014世界盃來臨。對於一支五屆世界盃冠軍，Peter有兩點要提出，第一點係巴西近年好少球員或領隊彈起，講嚟講去都係得尼馬一個。其實巴西名宿卡路士阿拔圖曾經講過，尼馬只顯示出個人技術出眾，但從未顯示出佢有能力激活整支球隊，級數仍與比利或者馬納當拿有一大段距離。尼馬要突破自己嘅話，洲際國家盃就係佢最佳機會。

第二點係巴西領隊「大菲」史高拉利，「大菲」再度執教巴西本來係好事，但成績未如理想。如果今次唔能夠帶領巴西贏得洲際國家盃，「大菲」隨時要執包袱走人。喺前途未明嘅情況下，「大菲」一定要用盡所有辦法去提升球員士氣。Peter建議「大菲」可以同廿三個球員講，攞唔到洲際國家盃就冇機會再入選，2014世界盃搵過第二班去踢，相信呢班森巴兵一定唔敢揸流攤。

日本牌面上係輸蝕，事關陣中唔少國腳都經歷過漫長嘅歐洲球季，體力未必可以及時回復。惟有望意大利籍領隊沙哲朗尼可逼起日本球員鬥志，當正今場係決賽咁踢，咁先有機會同巴西抗衡。今場比賽Peter將會同大家一齊睇直播，記得坐定定唔好走開呀！