歐洲主流賽事完晒，近期騎呢波當道，上周留意到有場波出現驚人比數，科威特女子對烏茲別克大敗0比18！乜料呀！平均五分鐘失1粒，有冇搞錯？喂！堅冇搞錯o架！皆因佢哋第2場再以0比21不敵約旦女子隊，開出羽毛球賽嘅比分，連同最後一戰對黎巴嫩輸1比12，3戰狂失51球，平均每場失17球，邊個夠佢威？

科威特女子隊能夠創造呢個羞家紀錄，多得當地政府喺01年立法禁止女人參與足球运動，禁令直到08年先至取消，但由於資源嚴重不足，當地女子足运發展停滯不前，無論係參與西亞區內賽事，抑或出戰亞洲賽事，都係人見人愛嘅冇骨魚腩。睇番佢哋今次喺2014年亞洲盃女子足球外圍賽對約旦段片，班球員水準比業餘更業餘，對手幾乎每次中龍就入，但有得出場獻醜見下世面，總好過成世做井底之蛙，恥辱係成長嘅一部分，呢啲經驗相當寶貴。

講開騎呢波，上周仲有個上海足球邀請賽，上海三雄申花、申鑫同東亞齊齊登場，主辦單位搵埋韓職球隊FC慶南、大田市民同南非球隊自由洲明星隊齊齊拍跳。各軍球星只屬配角，申花老細朱駿先至係焦點，佢首戰對住大田市民御駕親征，打足全場，上半場打防中，換邊後踢前鋒，見到球隊失波又打番防中，真係多才多藝，佢尾段仲喺門前執雞建功，最衰球證唔識做吹佢越位。朱總奮力作戰，勁有睇頭，可惜今次賽事場場得三幾百人入場，啲球迷真係唔識貨！