日乙名牌球隊大阪飛腳今輪作客水戶蜀葵，飛腳將獲舊將宇佐美貴史回歸，但隊內王牌前鋒李安度蒙迪拉有機會離隊，趁呢段時期要全力衝刺搶分鞏固榜首地位，大軍五連勝氣勢勁，今戰可望再贏，捧客勝！

(周六下午5時開賽)

宇佐美貴史兩年前離開大阪飛腳，但喺德國班霸拜仁慕尼黑不受重用，上季被借至賀芬咸，發揮都係麻麻，佢決定返母會，日內會展開操練，希望爭取更多上陣機會。與此同時，飛腳有機會失去王牌前鋒李安度蒙迪拉，消息指佢月尾約滿就會離隊，佢今季貢獻十二個士哥，係隊中首席射手。

日乙頭兩位直接升班，一哥大阪飛腳領先第三位長崎成功丸7分，但球隊面臨失去首席前鋒李安度蒙迪拉，現階段要攞定分打底，始終宇佐美貴史回歸後要時間提升狀態，為免影響升班大業，依家場場都要搏。飛腳續有今野泰幸同遠藤保仁代表日本大軍缺陣，但對住中游分子水戶蜀葵夠殺o架喇！