阿King今日集中睇美職，東岸一哥蒙特利爾衝擊近日回復強勢，聯賽連盃賽五仗不敗，狀態急升，今仗作客哥倫布機員雖有尼斯達停賽，但無損進攻能力，而且球隊對上一場賽事已經係六月二日嘅事，抖咗近兩個星期，比起哥倫布機員剛於周五凌晨出戰美聯盃，多咗一大段時間休息，體力佔優，今場受讓強捧「讓球客勝」。

（周日早上7時30分開賽）

蒙特利爾衝擊人腳有幾勁其實唔使阿King點介紹，不過，一支球隊總會有上上落落，早排衝擊出現小小低潮但好快已經過去，話咁快又上晒力，最近五場保持不敗，合共入咗十二球，攻力強勁。鋒線上有前帕爾馬殺手迪華奧，喺美職高一班，頻頻士哥絕對唔少嘢，而且佢哋賽程有着數，對上嗰場作客贏肯薩斯體育會已經係兩個星期前嘅事，對迪華奧呢類老將夠晒休息更有利發揮。

對手哥倫布機員近期士氣低沉，上周聯賽慘負費城聯之後，剛於周五凌晨美聯盃又以1比2不敵芝加哥火焰，輸完波休息唔夠匆匆再戰，話冇影響你都唔信啦，所以蒙特利爾衝擊好着數，「讓球客勝」揀咗先。

至於科羅拉多急流對聖荷西地震要主Ｗ，客軍近況真係差，近五戰輸四場。球隊攻力曳，近五場只係入過一球而且近四作客零入球好難威脅到急流大門，科軍上仗幾乎贏勁旅FC達拉斯，捧主Ｗ。溫哥華白帽上仗不敵西雅圖海灣者，雙方合共入咗五球。白帽近四戰場場入兩粒，對家革命前鋒法根迪斯腳風極順，捧大盤啱路。