U21歐國盃賽事打到四強階段，隊隊都會打真軍，奪標熱門西班牙U21今仗惡鬥挪威U21，論名氣西班牙贏成條街，不過，挪威分組賽摸和意大利表現非常對辦，踢落絕對唔弱，呢場係六四波，西班牙頂盡小勝，讓到球半離晒譜，應博下盤！

（now 633及635周六晚11時30分直播）

西班牙近年雄霸世界球壇，不論大小國腳都喺歐洲名門球隊搵食。睇番西班牙U21今屆分組賽表現，佢哋頭兩場只係小勝，踢落唔係好突出，最後一戰大勝荷蘭U21，主要因為對手用咗唔少副選，賽果不能作準。西班牙U21今場四強對挪威U21，兩隊波差距唔係好大，肥叔認為西班牙頂盡讓一球，佢哋贏都未必贏到，依家讓到球半真係過晒火位，今次可試下盤。

與此同時，洲際國家盃正式開打，呢個賽事只係「高級友誼賽」，唔少球隊都係志在參與，競爭味道其實冇大家想像中咁大，都係嗰句，小注怡情玩吓啦！東道主巴西首戰鬥日本係師傅對徒弟，日本足球師承巴西，兩隊踢法都係差不多，但論球員級數，巴西真係高好多，今場讓到球半、兩球，個盤確係辣咗啲，但預期巴西都可照贏波贏盤，呢隻上盤亦可留意！